©via

先生常教訓咱做學問要對社會有貢獻，讀冊是為著咱大家兮未來
為啥杵這兮時間，阮會感覺阮所學無法教大家瞭解、相信？
相信做學問要對社會上兮弱者有貢獻，讀冊是為著弱者兮未來，因為強者無需要幫助？
相信工程、科學是用來幫助需要幫助這兮社會，尤其是需要幫助兮人，找出一條太家都歡喜安心兮做法？
相信有太家總滿意兮做法，樂生免全拆（已經拆掉百分之七十去了！），捷運亦會行？
相信保存樂生療養院代表著咱太家相信自己心中猶原有真心關愛別人兮能力？
相信咱兮繁榮發達無需要踏底其他人兮頭殼頂、拆掉咱自己兮過去、甚至犧牲環境兼安全？
相信樂生療養院代表著咱太家公家兮重要文化資產？甚至是受到聯合國關心兮文化資產？
相信樂生這地所在甚至是迴龍地區會發達、有文化兮重要所在？

咱若不聞不問，冷眼旁觀未記自己責任兮政客隨意欺侮需要幫助兮人、隨意拆掉咱太家公家兮過去、隨意破壞咱生活兮這片土地。
總有一日，這未記自己責任兮政客也會倒轉來對付你，因為伊永遠是為著伊自己。
總有一日，大自然會倒轉來威脅您兮生存發展，因為您已經破壞著地理上兮龍穴。
到時已經無人會使幫助您啊！

咱島上所有兮父母，請相信您子兒站出來支持樂生不是吃飽閒閒無聊不讀冊兼製造社會動亂。得是因為您子兒相信這做是為著咱生活兮這片土地。得是您子兒相信走出這步您對這片土地未來兮盼望才有成真兮可能。得是您子兒冊有真正讀到，相信書上兮公理正義，伊這會選擇站出來靠伊自己兮手去努力達成。
請您亦站出來，抵四月十五，這禮拜日，
無為著漢生患者，無為著文化資產，無為得著國際承認；
是為著您兮子兒，為著您兮島，為著自己兮夢，咱來支持樂生療養院。

住地新莊兮各位識大，樂生這地土地確實關係著新莊兮發展無錯！抵四月十五，真心歡迎您亦來樂生聽看怎做亦會使將新莊安全兮、公平兮、有歷史有文化兮發展起來，無需要放棄您兮方便兼權利，無需要強逼人離開已經生活幾十冬兮家園，亦無需要看著新莊兮地理去破壞。

因為咱相信咱兮島是美麗、溫柔、慈愛、公平、安全兮所在！